Mit de kómplimènte, John Hertogh
Gelökkig kèn ich d’r goud taege. Taege die hits. Ich blief meistes bènne, ós hoes lik op ’t noorde, bènnne kèn ich ’t goud oethawte. Beheur ouch vanwaege de laeftied tot eine zogenuimde risicogróp… Tja. Mer ich höb gans väöl bewónjering veur alle luuj die in dees hits mótte wirke. Patsj aaf.
Sjus veur die hits zeen veer nao ’t boete-theatersjtök Zjwómbadjaore van Het Laagland gewaes, in ós sjtadspark. Waat ein geweldig sjtök. Euver de gesjichte van ’t zjwombad oppe Vieverwaeg.Mee es 30 acteurs van 30 pès 70 jaor deige dao aan mit, wo van gans väöl jeug. En de meiste mit Limburgse ‘roots’, väöl talent van eige sjtad en sjtreek. ’t Sjtök is gesjreven door eine Zittesje jóng: Benny Lindelauf, de hoessjriever van Het Laagland, dae zelf ouch fejn herinneringe haw aan ’t zjwömbad en veur dit sjtök Zitterdenaere haet ge-interviewd en ouch de leid- en anger tekste haet gesjreve.
Ein klein sjtökske:
Dènk aan oze zjwömbadjaore
Dènk aan mich, al bèn ich wied
Doe en ich, v’r sjtruime altied same
Oppe golve van d’n tied
Doe raaks mich nooits mee kwiet.
Vekanse
Veer zitte intösje al in de zomervekanse. Da’s goud te mirke, ouch op sjtraot en plei. Lekker röstig. Allein mit dat oere lange braoje oppe bbq höb ich get muite. Ich sjreef ooits dit gedich:
och wie sjoon is dezen aovend
jederein zit in zien häöfke
klasjeneiert fluusterentaere
mit plat water, wien of pils
gans d’n daag wurt naogeloupe
väöl sjlech nuuts dat gouf ’t neit
lankzaam wurt ’t leich get minder
zachte wènjt peunt ós gezich
pès eine naober zich bedach haet
dat ‘r barbecue-we geit
blawwe rouk deit sjtuil versjuve
en hae vlouk: ‘t vleisj verbrent
aan de anger ziej ein vuurkörf
gans gevöld mit vóchtig hout
haol de wesj nao bènne: gaw
en doog gans flot de vinster toe
…
och wie sjoon waar dezen aovend!
Zouwe die sjtäökesj waal ‘s aan de luuj mit COPD dènke? Of aan ’t milieu? Pès de volgende van KUL pès KULTUUR